Veciños dos concellos de Teo, Vedra e Boqueixón crean o colectivo A Ulla Viva

Nunha asemblea celebrada no local da Asociación Ponte Vella de Pontevea, arredor de 40 veciñas e veciños dos concellos de Teo, Vedra e Boqueixón constituíron o Colectivo A Ulla Viva, o cal únese á loita contra a instalación dunha macrocelulosa promovida por Altri en Palas de Rei, coordinándose coa Plataforma Ulloa Viva para a manifestación do vindeiro domingo 26.

Na xuntanza, na que participaron representantes de varias asociacións da zona, analizouse a afectación que a macrocelulosa tería para o río Ulla e a súa veciñanza, que consume auga potábel extraída directamente do río. Destacouse que o río xa chega moi deteriorado debido á deficiente depuración das augas residuais e á expansión das macroplantacións de viño nas súas beiras, que empregan numerosos produtos químicos. A instalación da factoría de Greenfiber-Altri, segundo sinalan, multiplicaría por tres esa contaminación.

O Colectivo A Ulla Viva decidiu levar a cabo diversas actividades para difundir esta problemática entre a veciñanza. A primeira acción será participar na manifestación do 26 de maio en Palas de Rei, animando a toda a veciñanza dos concellos da zona a participar. Ademais, emprazáronse a unha nova reunión o 5 de xuño para concretar actividades futuras.