22 mayo, 2024
O espazo colaborativo A Proa, no Milladoiro, acolleu este luns a presentación dos quince proxectos seleccionados para formar parte do Ames AV LAB, o laboratorio amesán para impulsar a nova produción audiovisual. No acto, ao que acudiron representantes do Concello de Ames e de dúas empresas integrantes das comisións de Gobernanza e Avaliación, presentáronse os proxectos seleccionados e o cronograma que se seguirá durante os oito meses de traballo.
Despois da rolda de entrevistas iniciada o pasado 25 de abril, para avaliar as máis de corenta candidaturas que aspiraban a formar parte do Ames AV Lab, este luns foron presentados os 15 proxectos seleccionados. Estiveron presentes a concelleira de Promoción Económica, Ana Belén Paz, e a técnica María Lloves, como representantes do Concello de Ames; Rocío González e Miguel Martínez, de Mirabelle Comunicación e Antonio Veiga, de Ficción Producciones, en representación das comisións de Gobernanza e Avaliación. Ademais, tamén asistiron Jorge Coira, Araceli Gonda e Ramón Rey, tres dos docentes que impartiran a parte formativa do laboratorio.
Durante a súa intervención, a concelleira de Promoción Económica, Ana Belén Paz, destacou que «foi moi difícil escoller só quince proxectos de entre todos os presentados, por mor da variedade e da calidade das propostas». Así mesmo, sinalou que «a través deste laboratorio de aceleración de proxectos búscase dotar de ferramentas ao talento local, e de crear sinerxias co tecido empresarial do sector».
Pola súa banda, Rocío González, de Mirabelle Comunicación, e Antonio Veiga, de Ficción Producciones, felicitaron aos seleccionados e animáronos a aproveitar ao máximo esta experiencia. Ademais, destacaron a complexidade á hora de valorar os proxectos presentados, pois todos eles estaban en distintas fases da produción.
PROXECTOS SELECCIONADOS
Series:
«As labregas» (Rosa Taboada)
«Amil» (Julia Herrmann)
«Orquestra Raíña» (Sergio Rodríguez)
«Deseo más» (Raúl Alonso)
Curtametraxes:
«Fóra de campo» (Neves Rodríguez)
«Raíces analóxicas» (Manu Seoane)
«Tres cartas de esperanza» (Silvia Varela)
«Nemeto» (Marta Rodríguez)
«Cuando los árboles lloran» (Miguel Bouzas)
«O Laúro» (Andrés Sanjurjo)
Longametraxes:
«42.195 metros» (Noelia Papín)
«Hacia el espacio interior» (Roi Grandío)
«Serenade» (Pedro Díaz)
Documentais:
«Dous nichos para Maruja» (Santiago Araújo)
«Tramoloxía» (Álvaro Alvite)
O Ames AV LAB é un laboratorio para o impulso da nova produción audiovisual dende o Concello de Ames. Enmárcase dentro do Plan de Emprego Local, cofinanciado pola Deputación Provincial da Coruña, así como un laboratorio de aceleración de proxectos audiovisuais para impulsar a produción, fomentar o talento emerxente e dinamizar o impulso do importante tecido produtivo audiovisual do concello de Ames