22 mayo, 2024
A oficina central de Turismo de Santiago foi sede os pasados días 20 e 21 de maio dun curso de formación especializada para os principais Film Commissioners da zona norte peninsular, un evento organizado como parte da programación formativa da Spain Film Commission, rede da que a entidade de promoción turística municipal forma parte a través da Santiago de Compostela Film Commission (SCFC).
Este curso estivo estruturado arredor de tres eixos fundamentais co obxectivo de aprender a promover eficazmente un destino como punto de interese para o sector audiovisual. O primeiro deles, «Aspectos legais no entorno audiovisual e incentivos», abordou as oportunidades e desafíos locais da industria audiovisual, en constante evolución, explicándose, por exemplo, os incentivos fiscais dispoñibles, proporcionando unha comprensión clara de como aproveitar estas vantaxes para atraer producións audiovisuais.
O segundo eixo, «Xanela única para Film Commissioners & Film Officers», centrouse en como un destino pode ofrecer información clara sobre os múltiples aspectos que implica a realización dunha produción audiovisual, desde os permisos necesarios para rodar en espazos públicos ata as taxas correspondentes.
Por último, o terceiro eixo, «Entorno do Hub Audiovisual», analizou os servizos profesionais proporcionados pola figura de «production services» no sector audiovisual, especialmente en producións cinematográficas. As responsabilidades desta figura inclúen a planificación e coordinación de proxectos, a xestión financeira, a contratación de equipos e empresas provedoras, e o cumprimento de prazos e orzamentos.
Ao longo do pasado curso 2023, a propia SCFC atendeu un total de 52 proxectos audiovisuais. Por tipo de formatos, estes proxectos inclúen: 5 series, 13 documentais, 11 programas de TV, 4 spots publicitarios, 4 curtametraxes, 1 vídeo clip e 2 vídeos promocionais. Por países, os proxectos foron orixinarios de España, Estados Unidos, Reino Unido, Xapón, Noruega, Alemaña, Portugal, Irlanda e China.