22 mayo, 2024
Tras unha ardua labor de restauración a cargo Xabier Bernárdez Fresco (Berna), o Peto de Ánimas de Cacheiras, en Teo, xa luce completamente renovado tras ser vandalizado cara a finais do pasado ano. Un traballo que supuxo a recuperación dun elemento catalogado por Patrimonio e incluído no inventario de bens culturais do Plan Xeral de Ordenación Municipal (ref. C.07) e que conta cunha gran veneración entre a veciñanza.
«Este monumento fora vandalizado con pintura vermella cara finais do pasado ano. Concretamente, os danos localizáronse principalmente no retablo central do peto de ánimas no que figura a Virxe María suspendida entre as nubes que tende a man para liberar do lume do purgatorio a tres almiñas», sinalan dende o Concello.
Nesta liña, xunto co de Raxó, o Peto de Ánimas de Cacheiras é considerado como unha das mellores mostras etnográficas e da arquitectura popular ao culto aos mortos e da devoción ás ánimas, destacando pola súa representación de meniños entre as lapas, purgando os seus pecados, un feito que é pouco habitual, pois contraponse coa peculiar inocencia infantil.
Precisamente, por esa gran importancia e veneración que ten este elemento, o Concello de Teo condenou de forma enérxica o acto de vandalismo que sufriu a obra, tramitando a correspondente denuncia «e solicitando á veciñanza a súa colaboración para, ante este tipo de comportamentos destrutivos, se denuncien os actos».
Cómpre lembrar que esta figura foi restaurada no ano 1987 e máis recentemente no 2009. Orixinalmente atopábase xusto no cruce entre a estrada comarcal de Santiago a Estrada coa de Cacheiras ás Galanas, pero coa reforma da actual AC-841 foi traslada ao seu emprazamento actual para garantir a súa conservación e facilitar a súa valorización.