21 mayo, 2024
Un ano máis, os mozos e mozas de entre 14 e 17 anos terán a oportunidade de participar nun campamento de verán de surf no concello de Oleiros, grazas ao programa organizado pola Concellaría de Dereitos e Servizos Sociais, Promoción Económica e Xuventude. A actividade desenvolverase do 1 ao 8 de xullo, e o prazo para presentar as solicitudes estará aberto desde hoxe, 20 de maio, ata o 3 de xuño.
Este campamento, organizado polo Departamento de Mocidade, ten como obxectivo facilitar a conciliación familiar nas vacacións de verán, ofrecendo un ocio alternativo e saudable que tamén favorece o coñecemento do patrimonio natural de Galicia e fomenta a convivencia entre os mozos e mozas. O programa incluirá, ademais de surf, outras actividades deportivas como sendeirismo e snorquel, e terá lugar no albergue de Santa Cruz de Oleiros.
Así, a iniciativa está dirixida a mozos e mozas empadroados no Concello de Santiago, prioritariamente entre 14 e 17 anos. En caso de quedar prazas vacantes, atenderanse outras solicitudes.
«Ofértanse 26 prazas, tres delas reservadas para persoas derivadas desde o departamento de Servizos Sociais. No caso de existir máis demanda que prazas, farase un sorteo público, e no caso de solicitudes de varios irmáns, se un deles obtén a praza adxudicaráselle directamente aos outros para garantir a conciliación familiar (agás se trate da última praza a adxudicar no sorteo)», sinalan dende o Concello.
O prazo de preinscrición estará aberto desde hoxe, 20 de maio, ata o 3 de xuño e custo da actividade será de 120 euros, con descontos a 100 euros para segundos irmáns e familias numerosas, e unha exención do 100% para participantes de familias en risco de exclusión social, previo informe do departamento de Servizos Sociais. Os pagos deberán realizarse antes do 20 de xuño.
En canton ás solicitudes de preinscrición, estas deben presentarse na sede electrónica do Concello de Santiago a través do trámite ‘Preinscrición en campamentos para a mocidade’ utilizando o modelo MC005, ou de forma presencial no Rexistro Xeral do Concello de Santiago (rúa Presidente Salvador Allende). No caso de presentar a instancia noutro rexistro ou por correo, é preciso informar desta circunstancia enviando un correo electrónico a dptoxuventude@santiagodecompostela.gal.