As rutas de arquitectura contemporánea promovidas polo CGAC continúan este vindeiro 25 de maio

No día de hoxe finaliza o prazo para poder inscribirse na próxima sesión de ‘Actuacións de bordo’, unha ruta de arquitectura contemporánea promovida pola Cidade da Cultura na que se anima aos participantes a percorrer a cidade para descubrir aqueles espazos urbanos que experimentaron transformacións nas últimas décadas.

«Esta nova ruta recolle unha mostra das denominadas “arquitecturas de bordo”, é dicir, actuacións que conectan zonas da cidade construídas en distintas épocas. Falaremos da relación entre a arquitectura e a paisaxe, da escala urbana, da incorporación dos espazos verdes á trama da cidade, do diálogo entre tradición e modernidade, da pedra e das novas linguaxes arquitectónica», destacan dende o CGAC, dende o partirá este percorrido falando da importancia desta primeira obra de Álvaro Siza Vieira en Santiago de Compostela.

«Continuaremos a camiñada polo Parque de San Domingos de Bonaval, obra realizada pola paisaxista galega Isabel Aguirre en colaboración con Álvaro Siza; o complexo residencial da Caramoniña, de Víctor López Cotelo; e, desde a distancia, a intervención levada a cabo no Monte Gaiás, coa Cidade da Cultura. De regreso ao CGAC, falaremos da importancia das intervencións de pequena escala, co exemplo da Casa 2M, do estudio de arquitectura 2es+», expica o Centro.

En canto á inscrición, a actividade é gratuíta e para participar é necesario inscribirse previamente dentro dos prazos previstos para cada unha das sesións enviando unha mensaxe electrónica a cgac.educacion@xunta.gal cos seguintes datos: nome completo, número de teléfono, correo electrónico e estudos, área de traballo ou interese. Poderanse inscribir un máximo de dous participantes mediante cada solicitude. As prazas cubriranse por orde de inscrición e as persoas rexistradas recibirán unha notificación do estado da súa solicitude por correo electrónico.