14 mayo, 2024
O alcalde, Manuel González, e o tenente alcalde e concelleiro de comunicación, Anxo Núñez, presentaron hoxe a aplicación móbil municipal «Outes Informa». Esta aplicación é un servizo de balde para que toda a veciñanza e asiduos ao concello teñan acceso fácil e sinxelo a toda a información municipal de relevancia.
En palabras do alcalde «Esta aplicación supón un salto cualitativo nas comunicacións do concello. Outes informa supón un paso adiante na modernización das canles de comunicación e servirá para achegar coñecemento a golpe de un click de todos as actividades e procesos administrativos máis tamén enviarlle ao concello as diferentes incidencias e propostas que teña a cidadanía.»
A través desta aplicación poderanse ver e recibir notificacións sobre avisos, anuncios e novas municipais, así como tamén consultar a axenda de eventos e actividades municipal, visualizar os vídeos dos plenos e roldas de prensa oficiais e esteblecer unha comunicación directa para enviar propostas ou incidencias.
O tenente alcalde fixo fincapé «Esta aplicación supón un grande avance na comunicación en dous sentidos entre a veciñanza e o concello. Queremos que non quede ninguén sen ter na súa man toda a axenda de actividades e servizos así como poder recibir os avisos e novas municipais en tempo real. Damos un paso máis dentro do noso plan de mellor de comunicación que comezamos hai uns meses e que seguiremos ao longo deste ano tamén renovando a páxina web municipal.»
Na aplicación Outes Informa podes consultar o listín telefónico dos distintos servizos municipais e outros teléfonos de interese, coñecer máis sobre o patrimonio ou obter un listado co comercio local e de proximidade.