As novas bolsas de comedor escolar, material e actividades extraescolares contarán cun maior orzamento e bases menos restritivas

A Xunta de Goberno aprobou hoxe a convocatoria para a concesión de bolsas de comedor escolar, adquisición de material escolar e realización de actividades extraescolares para o vindeiro curso académico, que tamén contará cunhas novas bases que facilitarán o seu acceso ás familias.

A concelleira María Rozas foi a encargada de presentar esta convocatoria que contará con tres modalidades: as dirixidas a familias con escaseza de recursos económicos, que poden ser bolsas de comedor ou bolsas para a realización de actividades extraescolares; as bolsas para a adquisición de material escolar para o segundo ciclo de educación infantil, que non quedan limitadas ás familias con escaseza de recursos como acontecía en anteriores convocatorias; e as bolsas de comedor para facilitar a conciliación.

Así, no relativo ás contías, a principal novidade prodúcese nas bolsas para a adquisición de material escolar, que serán dun máximo de 100 euros nun pago único, fronte aos 60 euros de anteriores convocatorias. Ademais, tal e como explicou a concelleira, «estas axudas poderán chegar a máis familias, ao non quedar vinculadas á situación de escaseza de recursos». Ata agora, estas bolsas  estaban limitadas a familias que non superaran a renda per cápita do 100% do IPREM anual, fixado en 7.200 euros, mentres que nesta edición poderán solicitar as axudas as familias que non superen a renda familiar anual de 5 veces o IPREM (36.000 euros anuais).

Na modalidade de bolsas de comedor por motivos de escaseza de recursos, a contía establecida na convocatoria mantense en 90 euros mensuais, pero como novidade incorpórase a posibilidade de conceder axudas de ata 180 euros mensuais no caso dos centros escolares de educación especial. Ademais, no caso destes centros as axudas tamén se poderán solicitar para Secundaria.

En canto ás bolsas para a realización de actividades extraescolares, abonaranse ata 15 euros mensuais no caso de actividades de 1 hora un un día á semana, e ata 30 euros mensuais para o caso de actividades dende 2 horas ou 2 días á semana. Nestes dous casos, establécense novos criterios de baremación, para facilitar o acceso ás axudas de máis familias.

Por último, nas bolsas de comedor para a conciliación da vida persoal, familiar e laboral, o importe establecido mantense en 45 euros mensuais. O umbral para acceder a estas axudas queda fixado en 5 veces o IPREM (36.000 euros anuais) , mentres que que na anterior convocatoria era de 3,5 veces o IPREM (25.200 euros anuais).

AUMENTO DO ORZAMENTO

Así, tal e como destacou María Rozas, a Concellaría de Dereitos e Servizos Sociais destinará 1.100.000 euros a esta convocatoria, o que supón en torno a un 40% máis ca na anterior. «Nas dúas anteriores edicións, a contía destinada a estas axudas foi de 795.000 euros, e hai só dez anos, no curso 2014-2015, o Concello de Santiago dedicaba tan só 87.000 euros ás bolsas de comedor escolar», destacou Rozas, quen engadiu que isto sitúa a Santiago «como a cidade galega que destina máis fondos por habitante a estas axudas, con 11 euros por habitante nesta convocatoria, fronte aos 8 da Coruña ou os 4,6 euros por habitante de Vigo».