O programa FemCoders buscará reducir a fenda dixital de xénero no sector tecnolóxico

Mellorar a ocupabilidade e fomentar a inserción laboral representan os grandes obxectivos dun  Programa Integrado de Emprego impulsado polo Concello de Santiago e do que xa se benefician cerca de un cento de mulleres desempregadas. Nesta liña, a responsable da concellaría de Dereitos e Servizos Sociais, Promoción Ecoómica e Xuventude, María Rozas, deu conta hoxe das actividades, que se desenvolven ata o mes de novembro, entre as que destacou a acción FemCoders, unha actividade novidosa dirixida a reducir a fenda dixital de xénero no sector tecnolóxico.

Esta novidosa iniciativa ten como obxectivo reducir a fenda dixital de xénero no sector tecnolóxico, «e máis en concreto o ámbito da programación, no que as empresas adoitan contar exclusivamente con traballadores homes», según sinalou Rozas. Trátase do programa FemCoders, que se desenvolve en colaboración con Factoría F5, unha asociación sen ámimo de lucro que tén en marcha a primeira rede de escolas dixitais solidarias, inclusivas e gratuítas do Estado. Santiago incorporouse a esta acción, «que non é unha formación ao uso, senón que se basea nun traballo práctico moi intensivo e un acompañamento posterior e un labor de mediación coas empresas para lograr a inserción laboral das participantes».

FEMCODERS
A representante de Factoría F5, Rebeca Rodríguez, explicou que a entidade traballa con colectivos vulnerables, «co obxectivo de tender pontes entre estas persoas e o sector tecnolóxico, coas empresas que tamén teñen dificultades para procurar determinados perfís profesionais». Esta actividade, pola súa parte, consiste no desenvolvemento de obradoiros intensivos, cun enfoque totalmente práctico e orientado cara a inserción laboral. Deste xeito, as mulleres participantes recibirán unha formación de 850 horas en seis meses, a través dunha aula virtual na que traballan en tempo real e en equipo. A formación está centrada no desenvolvemento de páxinas web, e non se requiren coñecementos previos de programación. Rematada a fase da formación, Factoría F5 mantén o asesoramento de cara a inserción laboral.

Ademais, este programa FemCoders de Factoría F5 chegará capital compostelá coa garantía de ter sido elixido finalista do «Google.org Impact Challenge for Women and Girls 2021», entre case 8.000 proxectos presentados, destinados ao empoderamento feminino. O ano pasado, esta actividade logrou unha taxa de éxito do 76% entre as persoas participantes no norte do Estado.