7 mayo, 2024
Membros do goberno municipal, liderados pola rexedora Goretti Sanmartín, reuníronse con representantes do Foro Cívico para abordar os grandes asuntos da capital compostelá en diferentes frentes e os seus avances, así como poñer en común perspectivas do executivo e a propia organización en relación a estos.
Nesta liña, Sanmartín compartiu as últimas novidades sobre a reunión mantida ca Xunta de Galicia na busca dunha solución á mobilidade e ao aparcadoiro na contorna do CHUS, sinalando que o Goberno autonómico enviará unha proposta de protocolo marco e, a partir de aí, redactaranse os convenios para o aparcadoiro e os accesos, coa administración autonómica a encargarse da súa licitación e contratación.
Tamén abordouse no encontro a creación da empresa municipal de vivenda, coa posibilidade de centrarse na recuperación e na rehabilitación de inmobles como prioridade, ademais da necesidade de investimentos da Xunta en vivenda en Santiago de Compostela. Nese sentido, o Concello ofrecerá algunhas parcelas para vivenda protexida.
Entre as iniciativas en marcha, a alcaldesa mencionou a estación depuradora de augas residuais, cuxa obra comezou en febreiro, co obxectivo de concluíla para mediados de 2026 para que «sexa unha realidade para acabar coa contaminación aos ríos».
Con respecto á estación intermodal, prevése a licitación do aparcadoiro o próximo ano, con fondos nos Orzamentos Xerais do Estado de 2025, mentres que proxecto Orbital, xa licitado por 33 meses, estímase que estea rematado para o verán.
A «aposta pola calidade e por rutas internacionais» foi mencionada por Sanmartín con respecto ao novo modelo turístico que se pretende impulsar dende o Concello, así como transformacións na política aeroportuaria e a necesidade de promover rutas internacionais para diversificar o turismo.
Outro tema tratado foi o da parcela do antigo Peleteiro, prevista para o 10 de maio, e na que, sinalou Sanmartín, o consenso coa propiedade a través dun cambio de planeamento urbanístico.
Analizaron tamén na reunión as necesidades xerais, como residencias universitarias, actividades culturais e mobilidade, así como a petición do Foro Cívico sobre o abaratamento de solo industrial e a creación de residencias de terceira idade e centros de día. Nesta liña, o portavoz do Foro Cívico, Carlos García Cumplido, sinalou que «nos temas importantes para a cidade ponse de manifesto que cando hai unha colaboración e un apoio unánime dos grupos políticos e se chega a acordos, a cidade medra, como no caso recente do CHUS e da EDAR». «Esta é unha mostra do que o Foro Cívico pretende, do que significa traballar todas as administracións polas grandes infraestruturas da cidade», indicou.
Pola súa banda, Goretti Sanmartín, quen estivo acompañada polo tenente de alcaldesa María Rozas e do concelleiro de Urbanismo Iago Lestegás, definiu o encontro como «satisfactorio» e afirmou concordar «coa liña e coa defensa que fai o Foro Cívico deles para o desenvolvemento da cidade».