Máis de 80 contratos e uns 223 millóns de euros. Así é o Plan de Contratación deste curso

Prestar servizos públicos de calidade, desenvolver políticas sociais, culturais e de igualdade para a maioría, realizar unha transformación urbana e un mellor acceso á vivenda, así como avanzar nunha senda de sustentabilidade e de integración territorial, e avanzar na mellor gobernanza e noutro modelo de cidade son os principais puntos nos que se basa o recén presentado Plan de Contratación Municipal deste curso, o cal alíñase «cos grandes eixos estabelecidos no Orzamento de 2024 e cos compromisos deste goberno», según comentou o concelleiro de Economía, Facenda e Contratación, Manuel César, en rolda de prensa.

Durante a súa presentación, César definiu este Plan como «un instrumento de planificación esencial para a boa xestión da administración municipal», así como «unha folla de ruta que inclúe 82 contratos cun valor de 222.990.817 euros» na que se detallan
as necesidades institucionais que serán cubertas mediante a licitación de diferentes contratos maiores, esto é, suxeitos a regulamentación harmonizada (os de subministracións e servizos con valor estimado igual ou superior a 143.000 euros e o resto de contratos cuxo valor estimado é igual ou superior a 5.538.000 euros).

Tal e como explicou o propio edil de Contratación, dentro destes 82 contratos non aparecen aqueles que xa foron adxudicados durante os pasados meses, lembrando ademais que se trata «dun plan programático e orientativo e non dun compromiso explícito que obrigue a licitar todos os contratos relacionados nel, nin coas condicións sinaladas».

Así mesmo, o documento tampouco pecha «a posibilidade de realizar contratacións non sinaladas no mesmo e que poidan ser necesarias para cubrir necesidades non previstas no momento da súa publicación. Polo tanto, estaríamos perante un documento que recolle obxectivos específicos, medíbeis, alcanzábeis, relevantes e temporais».

Dentro da aposta polos servicios públicos de calidade, destaca a prestación integral de servizos de conserxaría e limpeza de centros escolares, pavillóns deportivos e centros socioculturais, a xestión do servizo público de transporte colectivo urbano de viaxeiros, o servizo de mantemento e conservación dos sistemas de control, regulación e xestión do tráfico e do túnel urbano do Hórreo ou a adquisición de vehículos para o Servizo de extinción de incendios e Salvamento.

En canto ás pollíticas sociais, culturais e de igualdade, destacan a xestión da rede de Centros Socioculturais (CSC), o Servizo de xestión e programación do centro xove de creación cultural, a iluminación de Nadal, o Plan anual de conciliación e plan de conciliación do verán ou a coordinación e funcionamento da Casa Xohana Torres e Servizo de Asesoramento LGTBI.

A reurbanización de rúas como García Lorca, Mallou e Ponte da Raíña, a rehabilitación de firmes asfálticos en distintas vías urbanas., a mellora das condicións de accesibilidade en diferentes puntos da cidade e diferentes actuacións no rural aparecen no apartado de vivenda e trasnformación urbana.

Por último, destaca dentro do apartado de mellora da gobernanza e outro modelo de cidade o mantemento integral de infraestrutura de servidores e de telecomunicacións, o servizo de Centro de Atención ao Usuario (CAU) ou os servizos para a transformación dixital e promoción do comercio local Proxecto Commarket Santiago.