21 septiembre, 2024
Arranca este martes na Facultade de Matemáticas da Universidade de Santiago de Compostela o congreso internacional Symmetry and Shape – Celebrating the 60th birthday of Prof. Eduardo García Río, que se prolongará ata o 27 de setembro, un evento que reúne a destacados especialistas en xeometría diferencial de todo o mundo, con participantes procedentes de países como Alemaña, Italia, Bélxica, México, Reino Unido e Australia.
O congreso inclúe un total de 13 conferencias invitadas, 18 comunicacións orais e, como momento destacado, unha sesión homenaxe ao profesor García Río o xoves pola tarde. A apertura oficial celebrouse esta mañá, ás 9:30 horas, na Aula Magna da Facultade de Matemáticas.
A xeometría diferencial, en particular o estudo das propiedades dos espazos que permanecen invariantes baixo certas transformacións —como destacou o matemático alemán Felix Klein—, será o tema central das exposicións do congreso. A simetría, entendida como esas transformacións que non alteran a forma dun obxecto ou espazo, xunto coa forma, relacionada coas medidas, dimensións e curvatura, serán obxecto de análise desde a xeometría riemanniana e a física matemática.
EDUARDO GARCÍA RIO
Eduardo García Río, catedrático da USC, é unha figura de renome no campo da xeometría semi-riemanniana. Doutorouse en 1992 na USC e desde entón desenvolveu unha carreira investigadora de grande impacto, con máis de 130 artigos publicados en revistas de prestixio e 7 monografías. Ademais, foi profesor visitante en universidades de renome internacional como Cornell e Kyoto.
Entre as súas contribucións máis importantes destaca a súa achega á resolución da conxectura de Osserman e os seus estudos sobre variedades Einstein, combinando técnicas alxébricas e xeométricas. García Río dirixiu 12 teses de doutoramento e mantén unha ampla colaboración internacional, con máis de 40 coautores.
Ademais, é editor de revistas de prestixio como o Journal of Geometric Analysis e Differential Geometry and its Applications, e desde 2023 é Académico Numerario da Real Academia Galega de Ciencias.